महिला व बाल विकास विभागाचा पुढाकार शासकीय बालगृह अकोला येथे दिवाळी पहाट उत्साहात साजरी

🔶अकोला (जिमाका): दिवाळी हा आनंद, उत्साह, प्रकाश आणि मांगल्याचा सण संपूर्ण देशभरात मोठ्या उत्साहात साजरा केला जातो. याच पार्श्वभूमीवर बाल न्याय मंडळ व बालकल्याण समिती यांच्या पुढाकाराने शासकीय बालगृह, अकोला येथे संस्थेत दाखल असलेल्या बालकांसोबत दिवाळी पहाट हा आनंददायी उपक्रम उत्साहपूर्ण वातावरणात साजरा करण्यात आला.

शासकीय बालगृहात निराधार, निराश्रित, हरविलेली तसेच काळजी व संरक्षणाची गरज असलेली बालके बालकल्याण समितीच्या आदेशानुसार दाखल असतात. या बालकांनाही सण-उत्सवांचा आनंद अनुभवता यावा, त्यांच्यामध्ये आपलेपणाची भावना निर्माण व्हावी आणि त्यांच्या चेहऱ्यावर आनंदाचे हास्य फुलावे, या उद्देशाने दिवाळी पहाट कार्यक्रमाचे आयोजन करण्यात आले.

कार्यक्रमाच्या निमित्ताने बालकांना पारंपरिक पद्धतीने ओवाळून औक्षण करण्यात आले. तसेच बालकांना सुगंधी उटणे लावून अभ्यंगस्नान घालण्यात आले. बालकांसाठी दिवाळी फराळाची विशेष व्यवस्था करण्यात आली होती. दिवाळीचे सांस्कृतिक महत्त्व, प्रेम, बंधुभाव आणि सामाजिक एकतेचा संदेश यावेळी बालकांना देण्यात आला.

या कार्यक्रमाला प्रमुख मार्गदर्शक म्हणून बाल न्याय मंडळाच्या अध्यक्ष श्रीमती रोशनी बन्सल उपस्थित होत्या. यावेळी बालकल्याण समितीच्या अध्यक्ष ॲड. अनिता गुरव, बाल न्याय मंडळ सदस्य ॲड. सारिका घिरणीकर, बालकल्याण समिती सदस्य ॲड. शिला तोष्णीवाल, श्री. राजेश देशमुख, जिल्हा बाल संरक्षण अधिकारी श्री. राजू लाडुलकर, शासकीय बालगृहाच्या अधीक्षिका श्रीमती जयश्री हिवराळे आदी मान्यवर उपस्थित होते.

तसेच बाल न्याय मंडळ, बालकल्याण समिती, शासकीय बालगृह, जिल्हा बाल संरक्षण कक्ष, चाईल्ड हेल्पलाईन, रेल्वे चाईल्ड हेल्पलाईन, विपला फाउंडेशन, तीक्ष्णगत मल्टीपर्पज वेलफेयर सोसायटी,एनकारेज फाउंडेशन आणि ISWS संस्थेचे अधिकारी व कर्मचारी मोठ्या संख्येने उपस्थित होते.

यावेळी मार्गदर्शन करताना बाल न्याय मंडळाच्या अध्यक्ष श्रीमती रोशनी बन्सल म्हणाल्या की, “खरोखरच माझे अहोभाग्य आहे की, या बालकांसोबत दिवाळी साजरी करण्याची आणि त्यांच्या जीवनात आनंदाचे दिवे प्रज्वलित करण्याची संधी मला मिळाली. बालकांच्या चेहऱ्यावरील आनंद आणि त्यांच्यासोबत सण साजरा करण्याचा अनुभव अत्यंत समाधान देणारा आहे.”

कार्यक्रमाचे सूत्रसंचालन शासकीय बालगृहाचे शिक्षक श्री. संजय मोटे यांनी केले.

बालकांचे संगोपन, शिक्षण, आरोग्य आणि सर्वांगीण विकास यासोबतच त्यांना सण-उत्सवांचा आनंद मिळवून देणे हीदेखील संस्थेची महत्त्वपूर्ण जबाबदारी आहे. अशा उपक्रमांमुळे बालकांमध्ये आनंद, आत्मविश्वास, आपलेपणा आणि सकारात्मकतेची भावना निर्माण होण्यास निश्चितच मदत होते. बालकांच्या जीवनात आनंदाचे क्षण निर्माण करण्यासाठी अशा उपक्रमांचे आयोजन करणे ही काळाची गरज असल्याचे यावेळी अधोरेखित करण्यात आले.

🌴 वृक्ष वाचवा🌴पृथ्वी वाचवा 🌴

🌴||झाडे लावा🌴झाडे जगवा||🌴. 

०००