नवकल्पना, संशोधन आणि सर्जनशीलतेचा संगम

कॉलेज ऑफ इंजिनिअरिंग अँड टेक्नॉलॉजी, अकोला येथे जिल्हास्तरीय ‘आविष्कार २०२६’ 

       नवकल्पना, संशोधन आणि                      सर्जनशीलतेचा संगम

🔶अकोला : संत गाडगे बाबा अमरावती विद्यापीठाच्या प्रायोजित जिल्हास्तरीय ‘आविष्कार २०२६’ स्पर्धेचे आयोजन मंगळवार, दिनांक २७ ऑक्टोबर २०२६ रोजी कॉलेज ऑफ इंजिनिअरिंग अँड टेक्नॉलॉजी, बाभूळगाव, अकोला येथे करण्यात आले. या स्पर्धेत अकोला जिल्ह्यातील विविध वरिष्ठ महाविद्यालयांमधील एकूण १२० संघांनी सहभाग नोंदविला. सुमारे १९० विद्यार्थ्यांनी आपल्या संशोधन प्रकल्पांचे, नाविन्यपूर्ण कल्पनांचे तसेच शैक्षणिक संशोधनाचे सादरीकरण करून आपली गुणवत्ता प्रदर्शित केली.

‘आविष्कार २०२६’ ही स्पर्धा सहा प्रमुख विषयगटांमध्ये आयोजित करण्यात आली. यामध्ये मानवविद्या, भाषा व ललित कला; वाणिज्य, व्यवस्थापन व विधी; शुद्ध विज्ञान; कृषी व पशुसंवर्धन; अभियांत्रिकी व तंत्रज्ञान; तसेच वैद्यक व औषधनिर्माणशास्त्र या विषयांचा समावेश होता. ही स्पर्धा पदवी (UG), पदव्युत्तर (PG) आणि पदव्युत्तर संशोधन (PPG) अशा तीन स्तरांवर आयोजित करण्यात आली. 

या स्पर्धेचे आयोजन महाविद्यालयाचे प्राचार्य डॉ. प्रशांत थोरात यांच्या  मार्गदर्शनाखाली करण्यात आले. आविष्कार २०२६ चे अकोला जिल्हा समन्वयक डॉ. पंकज अर्डक यांनी उद्घाटन समारंभात प्रास्ताविक केले. यावेळी त्यांनी अकोला जिल्ह्यातील विविध महाविद्यालयांतून सहभागी झालेल्या विद्यार्थी स्पर्धकांचे तसेच महाविद्यालयीन समन्वयकांचे स्वागत केले. संशोधन, नवकल्पना आणि सर्जनशीलतेचे महत्त्व अधोरेखित करून त्यांनी सर्व सहभागी विद्यार्थ्यांना त्यांच्या सादरीकरणासाठी आणि स्पर्धेतील यशासाठी शुभेच्छा दिल्या.

उद्घाटन समारंभाला एल. आर. टी. महाविद्यालय, अकोला येथील प्राध्यापक डॉ. वर्षा सुखदेवे प्रमुख अतिथी म्हणून उपस्थित होत्या, तर कार्यक्रमाच्या अध्यक्षस्थानी प्राचार्य डॉ. प्रशांत थोरात होते. यावेळी विविध विभागांचे प्रमुख डॉ. श्रीकांत सातारकर, डॉ. गोपाल झामरे, डॉ. रश्मी टाले, डॉ. अभिनंदन गुप्ता, डॉ. सुधीर ढोमणे, डॉ. प्रेम भनावत आणि प्रा. सौरभ सोनखास्कर उपस्थित होते.

महाविद्यालयाचे इनोव्हेशन अँड इन्क्युबेशन विभागप्रमुख प्रा. गजानन भारसाकळे यांनी आपल्या मार्गदर्शनपर भाषणातून सहभागी विद्यार्थ्यांना संशोधन, नवकल्पना आणि उद्योजकतेचे महत्त्व विशद केले. अध्यक्षीय भाषणात प्राचार्य डॉ. प्रशांत थोरात यांनी विद्यार्थ्यांना प्रोत्साहित करून संशोधनवृत्ती जोपासण्याचे आणि नाविन्यपूर्ण कल्पनांना प्रत्यक्ष कृतीत आणण्याचे आवाहन केले. तसेच बदलत्या औद्योगिक गरजांनुसार तांत्रिक ज्ञानासोबत व्यावसायिक कौशल्ये विकसित करण्याचे महत्त्व त्यांनी अधोरेखित केले.

प्रमुख अतिथी डॉ. वर्षा सुखदेवे यांनी संशोधन आणि विकासासाठी सातत्यपूर्ण परिश्रम, समर्पण, सर्जनशीलता आणि तार्किक विचारशक्ती ही आवश्यक कौशल्ये असल्याचे प्रतिपादन केले. स्पर्धेतील विजेत्या विद्यार्थ्यांना डॉ. श्रीकांत सातारकर ,डॉ. गोपाल झामरे आणि प्रा. गजानन भारसाकळे  यांच्या हस्ते प्रमाणपत्रांचे वितरण करण्यात आले. यावेळी विजेत्या विद्यार्थ्यांचे अभिनंदन करून त्यांच्या संशोधनात्मक कार्याला आणि भविष्यातील वाटचालीला शुभेच्छा देण्यात आल्या.

डॉ. मनीषा कोडापे, विद्यापीठ समन्वयक, आविष्कार २०२६ यांच्या मोलाच्या मार्गदर्शनाखाली डॉ. पंकज अर्डक यांनी अकोला जिल्हा समन्वयक म्हणून स्पर्धेच्या आयोजनाची जबाबदारी पार पाडली. त्यांच्या समन्वयातून स्पर्धेचे नियोजन आणि आयोजन यशस्वीरीत्या करण्यात आले.

उद्घाटन समारंभाचे सूत्रसंचालन प्रा. शर्वरी दीक्षित यांनी, तर पारितोषिक वितरण समारंभाचे सूत्रसंचालन प्रा. शारदा देशमुख यांनी केले.

या स्पर्धेच्या यशस्वी आयोजनासाठी प्रा. शशिकांत ठाकरे , प्रा. ऋतुजा देशमुख,प्रा. विजय कोकाटे, , प्रा. धीरज दांडेकर, , प्रा. राधिका राऊत, प्रा. अक्षय काळमेघ, , प्रा. सुधीर ढोमणे, प्रा. महेश पुंडकर , प्रा. अमित खेडकर,प्रा. चेतना भगत, प्रा. वेद कुलट, ,श्री. विठ्ठल ढोबळे श्री. महेंद्र पिठे आणि सारंग काकड यांनी मोलाचे योगदान दिले. सर्वांनी आपापल्या जबाबदाऱ्या समर्थपणे पार पाडून स्पर्धेच्या यशस्वितेसाठी परिश्रम घेतले.

या उपक्रमासाठी श्री शिवाजी शिक्षण संस्थेचे सन्माननीय अध्यक्ष श्री. हर्षवर्धनजी देशमुख, संस्थेचे सर्व सन्माननीय कार्यकारिणी सदस्य तसेच स्थानिक व्यवस्थापन पदाधिकारी यांचे मोलाचे मार्गदर्शन व सहकार्य लाभले.

०००