ईश्वरी कृपा प्राप्तीसाठी अंतःकरणापासून भक्तीची गरज : हभप अंजली भगवंत अनवाणे 

अकोला : बार्शिटाकळी तालुक्यातील सुप्रसिद्ध श्री सिद्धेश्वर महाराज संस्थान कोथळी बुद्रुक येथे  भागवत आणि कीर्तन सप्ताह आयोजित करण्यात आला आहे. या सप्ताहात  दि. २८ मार्च रोजी अकोला येथील युवा कीर्तनकार हभप कुमारी अंजलीताई अनवाणे यांचे कीर्तन झाले. या कीर्तनात त्यांनी प्रामाणिकपणे आणि अंतःकरणा पासून ईश्वराची आराधना केली, तर ईश्वर भक्ताची ईच्छा पूर्ण करतो,असे सांगितले.

         विजय नगरचा राजा रामदेवराय याने पंढरपूर येथील विठ्ठल मूर्ती पंढरपुरातील लोकांवर दबाव टाकून विजयनगर येथे नेली. परंतु पांडुरंगाचे परमभक्त श्री भानुदास महाराज यांनी विजयनगर येथे जाऊन पांडुरंगाचीची मनोभावे प्रार्थना केली. त्यामुळे पांडुरंगाने राजा रामदेवराय याचे मत परिवर्तन केले. 

       आणि श्री भानुदासानीं पांडुरंगाची मूर्ती पंढरपुर येथे परत आणली, अशाप्रकारे  ईश्वर केवळ निःस्वार्थ भक्तीचा भुकेला असून त्याला इतर कोणत्याही मार्गाने प्रसन्न करता येत नाही, असा संदेश त्यांनी आपल्या ओजस्वी कीर्तनातून दिला. 

       या कार्यक्रमाला श्री सिद्धेश्वर महाराज विश्वस्त मंडळ कोथळी बुद्रुक येथील पदाधिकाऱ्यांनी सहकार्य केले. तसेच कीर्तन ऐकण्यासाठी कोथळी व आसपासच्या परिसरातील नागरिकांची मोठ्या प्रमाणात उपस्थिती होती.