•  जिल्हास्तरावरील शासकीय कार्यालय स्पर्धेत

 

•   सहाय्यक संचालक नगर रचना अकोला शाखा कार्यालय राज्यातून प्रथम...

मुख्यमंत्र्यांनी केला निकाल जाहीर...

       

अकोला : राज्य शासनाच्या "१०० दिवसांच्या कार्यालयीन सुधारणा कार्यक्रमांतर्गत", राज्यातील सर्व जिल्ह्यांमधील ४२ जिल्हास्तरीय कार्यालयांमध्ये घेण्यात आलेल्या स्पर्धेचा निकाल काल मुख्यमंत्री  देवेंद्र फडणवीस यांच्या हस्ते जाहीर करण्यात आला. या स्पर्धेत अकोला येथील सहाय्यक संचालक, नगर रचना कार्यालयाने राज्यात प्रथम क्रमांक पटकावला असून, हा गौरव प्राप्त करणारे हे एकमेव नगर रचना कार्यालय ठरले आहे.

             अकोला येथील नगररचना व मूल्यनिर्धारण विभागाने श्री. सादिक ग. अली, सहाय्यक संचालक नगर रचना यांच्या कुशल नेतृत्वाखाली केलेल्या उल्लेखनीय कार्यामुळे हे यश शक्य झाले आहे. कार्यपद्धतीतील व्यावसायिकता, पारदर्शकता, वेळेवर सेवा पुरवण्याची कटिबद्धता आणि नवोन्मेषी दृष्टिकोन यांनी विभागाने राज्यभरात स्वतःची स्वतंत्र छाप उमटवली आहे.

तांत्रिकदृष्ट्या सक्षम असलेल्या या विभागाने बीपीएमएस (BPMS) प्रणालीचा प्रभावी वापर करून विकास प्रस्तावांचे जलद व पारदर्शक निराकरण साधले. शासनाच्या नियमांचे काटेकोर पालन करत शून्य प्रलंबित प्रस्ताव या उद्दिष्टाची यशस्वी अंमलबजावणी करण्यात आली. हे मॉडेल इतर जिल्ह्यांसाठी अनुकरणीय ठरत आहे.

याशिवाय, जिल्हाधिकारी कार्यालयास नियमित अहवाल सादर करताना कोणतेही कायदेशीर बंधन नसतानादेखील उत्तरदायित्व आणि पारदर्शकतेची उच्चतम पातळी जपली गेली आहे.

"सार्वजनिक सेवा हक्क अधिनियम, २००५" अंतर्गत, विभागाने नागरिकांच्या तक्रारी संवेदनशीलतेने हाताळल्या, जलद प्रतिसाद दिला व उत्तरदायित्व सुनिश्चित केले. कार्यालयात आदरयुक्त, सर्वसमावेशक व प्रेरणादायी कार्यसंस्कृती निर्माण करण्यात आली असून, कर्मचाऱ्यांमध्ये सकारात्मक ऊर्जा आणि सेवाभाव निर्माण झाला आहे.

नकारात्मकतेतून यशाच्या शिखराकडे वाटचाल...

हे यश अधिक लक्षणीय ठरते, जेव्हा भूतकाळात या कार्यालयाची प्रतिमा डोळ्यासमोर उभी राहते. कधीकाळी, हेच कार्यालय असे होते की जिथे अधिकारी बदलीने येण्यास कचरत होते; इतकेच नव्हे, तर काही अधिकाऱ्यांनी येथे नियुक्ती झाल्यावर स्वेच्छा निवृत्ती घेण्याचा पर्याय निवडला होता. कार्यालयाच्या नकारात्मक प्रतिमेमुळे अशी परिस्थिती निर्माण झाली होती.

सध्या या सर्व नकारात्मकतेला पूर्णविराम देत, कार्यालयाने स्वतःचा कायापालट साधला आहे. आज सहाय्यक संचालक नगर रचना, अकोला या कार्यालयाचा संपूर्ण महाराष्ट्रात डंका वाजलेला आहे. एकेकाळी दुर्लक्षित असलेले हे कार्यालय आज उत्कृष्टतेचा प्रतीक बनले असून, कार्यक्षमतेचा नवा अध्याय लिहीत आहे.

या उल्लेखनीय यशाबद्दल अकोला नगर रचना कार्यालयातील संपूर्ण अधिकारी , कर्मचारी  टीमचे मनःपूर्वक अभिनंदन होत आहे. राज्यात प्रशासकीय सुधारणांचा आदर्श घालून देणारे हे कार्यालय इतर जिल्ह्यांसाठी प्रेरणास्थान ठरत आहे.