• पेट्रोल पंपावर मोफत हवा मिळत नाही, नियम वाऱ्यावर!
• हवा पंप 'शोभेचे साधन', नियमांकडे दुर्लक्ष
चंद्रपूर : जिल्ह्यातील अनेक पेट्रोल
पंपांवर ग्राहकांच्या हक्काची खुलेआम पायमल्ली होत आहे. मोफत हवा पंपाची सुविधा ही प्रत्येक वाहनधारकाचा हक्क असूनही, प्रत्यक्षात बहुतांश ठिकाणी ही सेवा बंद किंवा दाखवण्यासाठी ठेवलेली असल्याचे चित्र दिसून येत आहे. त्यामुळे जिल्हा प्रशासनाने याकडे लक्ष देऊन मोफत हवा, तसेच सुविधा संदर्भात पेट्रोल पंप चालकांना निर्देश द्यावेत, अशी मागणी नागरिकांनी केली आहे.
कारवाईचे निर्देश 'थंड'
मागील वर्षी जिल्हाधिकाऱ्यांनी सुविधा नसलेल्या पंपांवर कारवाईचे आदेश दिले होते. त्यानंतर काही पंपांनी सेवा सुरू केली होती. मात्र, आता पुन्हा अनेक ठिकाणी या सुविधा गायब झाल्या आहेत. एवढेच नव्हे, तर काही पंपांवर नियमित पेट्रोल आणि डिझेल उपलब्ध नसल्याचेही प्रकार घडत आहेत, त्यामुळे वाहनधारकांना त्रास सहन करावा लागत आहे.
ग्राहकांनी करावी तक्रार
'पेट्रोल पंपावर मोफत हवा, पिण्याचे पाणी किंवा शौचालयाची सुविधा नसेल, तर कंपनीकडे किंवा जिल्हा पुरवठा विभागाकडे तक्रार दाखल करता येते. तक्रार योग्य आढळल्यास संबंधित पंपावर कारवाई करण्यात येते.
हवा पंप 'शोभेचे साधन', नियमांकडे दुर्लक्ष
मोफत हवा, असे मोठे फलक पंपावर लावले असले तरी प्रत्यक्षात सेवा मिळत नसल्याचे चित्र आहे. कायद्यानुसार प्रत्येक पेट्रोल पंपावर मोफत हवा, स्वच्छ पिण्याचे पाणी, शौचालय आणि प्रथमोपचार पेटी या सुविधा अनिवार्य आहेत. परंतु वास्तवात अनेक ठिकाणी हवा पंप बंद असतात किंवा 'तांत्रिक बिघाड'चा बहाणा केला जातो. अनेकवेळा पंपावर हवा भरण्यासाठी गेल्यानंतर मशीन बंद आहे, किंवा काही वेळाने या, अशी कारणे सांगितली जात असल्याचेही नागरिकांचे म्हणणे आहे.
"जिल्ह्यात काही पेट्रोल पंपावर नागरिकांना सुविधा दिली जात नाही. मोफत हवा असा केवळ नावाला फलक लावला जातो. पेट्रोल पंपावर नागरिकांना सुविधा देणे अत्यावश्यक आहे. यासंदर्भात वेळोवेळी प्रशासनाला निवेदन दिले आहे. ग्राहकांच्या हक्कावर गदा आणणाऱ्यांवर कारवाई करणे आवश्यक आहे".
• नंदिनी चुनारकर
जिल्हाध्यक्ष,
अखिल भारतीय ग्राहक पंचायत, चंद्रपूर
टिप्पण्या
टिप्पणी पोस्ट करा