•  पाऊस : खिडकीतून पाहतांना.. 

कोसळणारे ढग अन् डोळ्यातून_वाहणारे_पाणी!

          मुसळधार पाऊस खिडकीत उभं राहून पहा. 

हात लांबव, तळहातांवर झेल पावसाचं पाणी..

इवलंसं तळं पिऊन टाक

बघ माझी आठवण येते का?

पाऊस, खिडकीतून पाहतांनाची ही छानसी कविता..

पण हाच पाऊस खिडकीतून पाहतांना, 

कोसळणारे ढग अन् डोळ्यात पाणी वाहत असेल तर??

माणूस कितीही श्रीमंत असो, वा गरीब..

प्रत्येकासाठी त्याची मुलगी राजकुमारीच असते.

अन् याच मुलीचा विवाह प्रत्येक बापासाठी आयुष्यातला सर्वात मोठा क्षण अन् सण सुध्दा असतो. 

हा विवाह कुठल्याही अडथळ्याविना पार पडावा,

हेच त्याचं स्वप्न असतं. 

जिवाच्या डोळ्यांना लागल्यात धारा,

मुली तुझ्या सुखासाठी खटाटोप सारा!

याप्रमाणेच हा सारा खटाटोप लेकीच्या सुखासाठी.

चार तासांवर विवाह सोहळा येऊन ठेपलाय, मांडव सजलाय अतिशय भव्य दिव्यपणे. हजारो वर्‍हाडासाठी जेवणंही बनलंय. दोन तासातच नवरदेवाची वरात निघणार, अन् नवरी म्हणून लेक बोहल्यावर चढणार.. हे स्वप्न वडीलांच्या डोळ्यात असतांना, त्याच डोळ्यांनी अचानक भरुन आलेल्या ढगातून, सोसाट्याच्या वार्‍यातून, गडगडणार्‍या आभाळातून अन् कडकडणार्‍या विजातून सुरु झालेला पाऊस पहावा.. अन् तो पाऊस पाहतांना त्या लेकीच्या बापाच्या डोळ्यातून आसवाचं पाणी वहावं, किती वेदनादायी असावा हा प्रकार? 

असंच झालं, शुक्रवार १६ मे च्या दुपारी. माजी आमदार तथा भाजपाचे नवनियुक्त जिल्हाध्यक्ष विजयराज शिंदे यांची लेक डॉ.शिवानी हिचा विवाह डॉ.निलेश यांच्याशी बुलढाणा अर्बन रेसीडेन्सीच्या विशाल मैदानात पार पडणार असतांना, विवाहाच्या या लोकसोहळ्याला अवघे ४ तास बाकी असतांना दुपारी अडीच वाजता अचानक आभाळ दाटून आले, अन् सोसाट्याच्या वार्‍यासह तुफानी पावसाच्या धारा सुरु झाल्या. यावेळी विजयराज शिंदे हे रेसीडेन्सीच्या वरच्या खिडकीतून तो पाऊस पाहत होते.. मात्र काहीच करु शकत नव्हते. तीन दिवसांपासून पावसाळी वातावरण बनल्याने, अन् दोन दिवस आधी सकाळीच पाऊस पडल्याने लेक शिवानीच्या डोळ्यात त्यांनी पाणी पाहिले, अन् या बापाने अवघ्या दीड दिवसात वॉटरप्रुफ मंडपची व्यवस्थाही केली. परंतु मुख्य स्टेज अन् समोरचा परिसर मोकळाच होता. त्यात ग्राऊंड काळ्या मातीचे, अर्थात थोड्याच पावसात चिखल होणारे. हा पाऊस कोसळत होता, पण पाणी वाहत होते ते विजयराज शिंदे यांच्या डोळ्यातून!

एका तासानंतर पाऊस थांबला, मंडपवाल्यांनी जोरात तयारी सुरु केली. पुन्हा लगीनघाई सुरु झाली. सायंकाळी ‘झाले मोकळे आकाश’ अशी परिस्थिती बनली, अन् लग्न अतिशय व्यवस्थीत पार पडले. लग्नात तत्पुर्वीच मुख्यमंत्री येऊन गेले होते. सायंकाळी अनेक मंत्री, आमदार, खासदार व नेते तथा सामान्यांची तुडूंब गर्दी जमली. पावसामुळे विंटेज कारने एन्ट्री असे काही इव्हेंट करता आले नसलेतरी, हा सोहळा मात्र नंतर ‘शाही’ पध्दतीने नाहीतर ‘लोकशाही’ पध्दतीने पार पडला. आभार मानतांना विजयराज भाऊक झाले होते. सायंकाळी थांबलेला पाऊस, ही आई भवानीची कृपा असल्याचे ते म्हणाले.. 

लेकीच्या लग्नात कितीही मोठा असला तरी, दिसला तो लहान झालेला बाप. पाऊस कोसळत असतांना, डोळ्यात अश्रूंचे पाणी दाटून आलेला बाप.. अन् असहाय्यपणे पाऊस खिडकीतून बघणारा बाप. किती हा भाव-भावनांचा संमिश्र, ओलावा!!  :  राजेंद्र काळे