श्री बाराभाई गणपती वेबसाईटमध्ये नवीन सुधारणा 

    - राहूल इंगळे यांची माहिती

------------------------------------------------

                  

(विजय केंदरकर)

अकोला : 

बाप्पाच्या कृपेने आणि आपणा सर्व भक्तांच्या सहकार्याने, श्री बाराभाई गणपती उत्सव अकोला यांच्या अधिकृत वेबसाईटमध्ये काही नवीन वैशिष्ट्ये व सुधारणा करण्यात आल्या आहेत. आपण आपल्या मोबाईलवर, संगणकावर किंवा टॅबवरून खालील लिंकवर जाऊन नवीन अद्यतने अनुभवू शकता

 https://barabhaiganpatiakola.in. अशी माहिती श्री बाराभाई गणपती उत्सव मंडळाचे तथा वेबसाईटचे युवा निर्माते श्री राहूल इंगळे यांनी प्रस्तूत प्रतिनिधीसोबत बोलतांना दिली.

         सविस्तर माहिती देतांना त्यांनी सांगितले की, लोकमान्य टिळकांनी सुरू केलेला गणेशोत्सव विदर्भातील काही जुन्या गणेशोत्सव मंडळांनी आणि घराण्यांनी तेवढ्याच श्रद्धेने व भक्तिभावाने जोपासला आहे. या मंडळ व घराण्यांच्या उत्सवाने आता शतके ओलांडली आहेत. मात्र, त्यांच्याकडील गणेशाची मूर्ती, त्यामागच्या कलाकारांचे हात आजही ती परंपरा जतन करून आहेत. 

      अकोल्यातील जुने शहरातील जयहिंद चौकातील पेशवेकालीन इतिहास असलेला मानाचा श्री बाराभाई गणपती विदर्भासह संपूर्ण महाराष्ट्रात प्रसिद्ध आहे. या गणपतीची प्राचीन परंपरा नाथ कुटुंबीय व अकोलेकरांनी भक्तिभावाने जपली.  श्री बाराभाई गणपती अकोला शहरातील गणेशोत्सवाचे एक आगळे-वेगळे आकर्षण. वऱ्हाडातील सर्वात प्राचीन व पारंपरिक गणपती म्हणून श्री बाराभाई गणपतीचा नावलौकिक आहे.

      श्री बाराभाई गणपतीची स्थापना नेमकी केव्हापासून झाली याची कोणतीही नोंद नाही. या गणपतीचा पेशवेकालिन बाराभाईच्या कारस्थानांशी निकट संबंध असावा.  म्हणूनच याला बाराभाई हे नाव प्राप्त झाल्याचे जाणकारांचे म्हणणे आहे. प्राचीन काळी श्री बाराभाई गणपतीची रुढीपरंपरेने स्थापना केल्या जात होती. मात्र, कालांतराने गणेशोत्सवातील सार्वजनिक उत्साह कमी झाला व ही परंपरा संपुष्टात येऊ नये म्हणून संस्थापक अध्यक्ष कै.भगवाननाथ इंगळे यांनी आपल्या घरी श्री बाराभाई गणपतीची स्थापना केली. तेव्हापासून श्री बाराभाई गणपती संपूर्णत: नाथ कुटुंबाचा आहे.

      श्री बाराभाई गणपतीची परंपरा नाथ कुटुंबियांनी गेल्या अनेक वर्षांपासून जोपासली. या गणपतीला मानाचे स्थान प्राप्त होऊन आज अनेक वर्ष लोटले आहेत. लोकमान्य टिळक यांनी महाराष्ट्रात सार्वजनिक गणेशोत्सव सुरू केल्यानंतर इंग्रजकालीन परिस्थतीतही अकोल्यातून कै.भगवाननाथ इंगळे यांनी श्री बाराभाई गणपतीसह शहरातील सात-आठ मंडळांची मिरवणूक काढली होती. तेव्हापासून अकोल्यातील गणपती विसर्जन मिरवणुकीत पहिल्या स्थानावर श्री बाराभाई गणपती व दुसऱ्या स्थानावर श्री राजराजेश्वाराचा गणपती पालखीत असतो. अकोल्यातील ही प्रथा १८९० च्या सुमारास सुरु झाली. या गणपतीच्या विसर्जन मिरवणुकीत पारंपरिक दिंड्या असतात. श्री बाराभाई गणपतीची पालखी वाहणारे भोईराज सुध्दा पिढ्यांपिढ्या आपली सेवा गणेश चरणी अर्पण करीत आहेत. 

       अनेक वर्षांपासून असलेल्या या गणपतीचे अकोलेकरांच्या मनात श्रद्धेचे भाव आहेत. श्री बाराभाई गणपतीला अनेक जण नवस बोलतात, साकडे घालतात. भक्तांच्या श्रद्धेला आणि विश्वासाला श्री बाराभाई गणपतीने कधीही तडा जाऊ दिला नाही, असे मोठ्या अभिमानाने नाथ कुटुंबीय सांगतात. अकोल्यातील श्री बाराभाई गणपती एकात्मतेचे प्रतीक आहे,असेही राहूल इंगळे यांनी शेवटी बोलतांना सांगितले.

 या वेबसाईटमध्ये आकोलेकरांकडून आणखी काही नवीन सुधारणा असतील त्याचे स्वागत असल्याचे सांगून त्यांनी  9881317069  या नंबरवर संपर्क साधण्याचे आवाहनही केले आहे.

https://barabhaiganpatiakola.in

=========================