• शतायुषी आत्याची अचानक एक्झिट...
लेखक : ॲड.सुधाकर खुमकर
स़ंवाद- 7020446473
बुलढाणा जिल्ह्यातील नांदुरा तालुक्यात खडदगाव हे आमच्या आत्याचे गाव... नर्मदाबाई पुंडलिकराव पाटील मानकर हे आत्याचे नाव... मात्र लहानपणापासून 'खडदगावची आत्या' हीच तिची ओळख आमच्या मनावर कोरलेली...आत्याच्या लग्नानंतर अल्पकाळातच मामा गेले... आत्या खचली नाही. एकुलता एक लेक अजाबराव पाटील मानकर यांचा सांभाळ करत जीवनाचा गाडा हाकला...आजबराव भाऊंनीही आईचा शब्द शेवटपर्यंत प्रमाण मानला. दानधर्म आणि देवदर्शनासाठी, तीर्थयात्रेसाठी भाऊंनी आईला कधीही रोखले नाही.
मामा गेल्यानंतर सुनी झालेली हवेली नातवांच्या आगमनाने पुन्हा फुलली, गजबजली. येणाऱ्या जाणाऱ्यांची वर्दळ, पाहुण्यांची आवभगत, सर्वांच्या ख्याली खुशाली विचारल्याशिवाय आत्याला चैन पडायची नाही. आमच्या वडिलांसह एकूण ५ भाऊ, त्यांना ३ बहिणी असा मोठा खटला... दरवर्षी एकाच्या घरी तरी काहीतरी लग्नकार्य ठरलेलं..आत्या हमखास बेलखेडला यायचीच. दोन वर्षांपूर्वी आत्याने वयाची शंभरी पूर्ण केलेली.
तरीही आमची आई गेल्याचे कळताच आत्या नातवाला घेऊन गावात हजर. खाण्या पिण्याचे पथ्य, सात्विक आणि धार्मिक विचार यामुळे या वयातही हाडांच्या शस्त्रक्रिया झाल्यानंतरही आत्या ठणठणीत झाली होती.
गेल्या आठ दिवसांपासून मात्र तिची अचानक तब्येत बिघडली आणि आज गुरुवारी ३ एप्रिल २०२५ रोजी तिने अखेरचा श्वास घेतला... तीन वर्षांपूर्वीच अजबराव भाऊंचेही निधन झाल्याने आत्या तशी खचली होती, पण नातवांनी आपल्या आजीला कशाचीही कमी भासू दिली नाही. आज आपल्या आजीला शेवटचा निरोप देताना सर्व नातवंडे (अमोल, अनंता, गोपाल,मधुसूदन) ढसाढसा रडत होती... आत्याच्या जाण्याने खडदगावातील हवेली पुन्हा एकदा सुनी झाली. आत्याला भावपूर्ण श्रद्धांजली...
• लेखक : ॲड.सुधाकर खुमकर
स़ंवाद- 7020446473
-------------------
बातमी व जाहिरातीसाठी संपर्क :
विजय द. केंदरकर
ज्येष्ठ पत्रकार तथा कार्याध्यक्ष
व्हाॕईस आॕफ मीडिया, अकोला जिल्हा
मोबा. नं. 9371854706
टिप्पण्या
टिप्पणी पोस्ट करा