•  लोकरंग अकोल्याच्या कला-संस्कृतीचा आधार बनेल 

•  अभिनेते भारत गणेशपुरे यांचे लोकरंग उदघाटन सोहळ्यात उद्गार

•  लोकरंग द्वारा आयोजित पहिलाच कार्यक्रम हाऊसफुल....

अकोला - गेल्या पन्नास वर्षात अकोल्यात कला क्षेत्रात खूप उलाढाली झाल्यात मात्र त्याची गती मंद दिसते. लोकरंग या सांस्कृतिक समूहाने ही उणीव भरून काढावी या हेतूने हा समूह कार्यरत राहणार असून अकोल्याच्या कला-संस्कृतीचा आधार बनेल असे उद्गार मराठी अभिनेते भारत गणेशपुरे यांनी शुक्रवारी येथे  काढले. 

      स्थानिक प्रमिलाताई ओक सभागृहात  शुक्रवार दिनांक १८ एप्रिल २०२५ रोजी सायंकाळी  लोकरंग सांस्कृतिक समूहाचे उदघाटन भारत गणेशपुरे यांच्या हस्ते झाले. यावेळी अभिनेत्री मधुरा वेलणकर, लोकरंग अध्यक्ष अनिल गावंडे, डॉ. गजानन नारे, अशोक ढेरे, प्रदीपसिंह राजपूत, किशोर बळी, अरविंद देठे, नीरज आवंडेकर, डॉ. संदीप चव्हाण, अविनाश परळीकर, महेंद्र कवीश्वर, डॉ. राजेंद्र सोनोने, शरद वानखडे, पुरुषोत्तम आवारे पाटील, गजानन घोंगडे, अनिल माहोरे, श्रीकांत पागृत, ॲड. सुधाकर खुमकर उपस्थित होते.     अकोला जिल्ह्यात सिनेमाचे चित्रीकरण होईल अशी अनेक स्थळे आहेत आणि प्रचंड क्षमता असणारे कलावंत सुद्धा आहेत. मात्र त्यासाठी सर्वानी एकत्र येत काहीतरी करण्याची गरज आहे, लोकरंग त्यासाठी पुढाकार नक्कीच घेईल, केवळ इव्हेन्ट न करता या समूहाद्वारे अभिनय कार्यशाळा आणि चित्रपट क्षेत्राला लागणारे मनुष्यबळ कसे पुरवता येईल याचाही विचार करेल असेही भारत गणेशपुरे यावेळी म्हणाले. गेल्या पन्नास वर्षात या शहरात पर्यायी नाट्यगृह उभे राहू शकले नाही, सगळेकाही सरकार करीत नसते, आपणही पुढाकार घ्यायला हवा, लोकांचे सहकार्य असले तर लोकरंग आगामी काळात या शहरात अत्याधुनिक नाट्यगृहाची शुद्ध उभारणी करेल असेही ते म्हणाले. 

लोकरंग समूहाचे अध्यक्ष अनिल गावंडे

लोकरंग समूहाचे अध्यक्ष अनिल गावंडे यांनी लोकरंग मागील भूमिका सांगताना दहा हजार अनामत आणि पाच हजार वार्षिक सदस्यता शुल्क घेऊन या समूहात कुणालाही सहभागी होता येईल,वर्षातून पाच दर्जेदार कार्यक्रम देण्यासोबतच वऱ्हाडी खाद्यमहोत्सव आणि दरवर्षी कलावंतांचा सन्मान केला जाणार असल्याचे त्यानी सांगितले. कार्यक्रमाचे संचालन ॲड. वल्लभ नारे यांनी केले तर आभार सुधाकर खुमकर यांनी मानले. 

  लोकरंग सन्मान 

 यावेळी अभिनेते भारत गणेशपुरे यांचा पहिला लोकरंग सन्मान पुरस्कार देऊन अभिनेत्री मधुरा वेलणकर यांच्या हस्ते सत्कार करण्यात आला. यावेळी त्यांना प्रदान करण्यात आलेल्या मानपत्राचे सुधाकर खुमकर यांनी वाचन केले. वऱ्हाडी भाषेचा झेंडा सात समुद्रापार नेण्याच्या कार्यासाठी गणेशपुरे याना हा पुरस्कार देण्यात आला. 

     बोरू ते ब्लॉग प्रयोग 

 लोकरंग समूहाच्या लोकार्पण सोहळ्याच्या निमित्ताने अभिनेत्री मधुरा वेलणकर अभिनित ' मधुरव : बोरू ते ब्लॉग ' हा नाट्याविष्कार यावेळी सादर करण्यात आला. दोन तासांच्या या प्रयोगात मराठी भाषेचा प्रवास आणि परंपरेचा आढावा यातून अतिशय सुंदरपणे घेण्यात आला. लोकरंगचा पहिलाच कार्यक्रम हाउसफुल झाला होता. कार्यक्रम संपल्यानंतरही कोणी उठायला तयार नव्हते, असे उत्कृष्ट सादरीकरण यावेळी करण्यात आले. नीटनेटक्या आयोजनाबद्दल रसिक श्रोत्यांनी लोकरंग टीमचे आभार मानले.