होमिओपॅथीक महाविद्यालयात व्याख्यान संपन्न
अकोला-आधुनिक व प्रगत होत चाललेल्या विज्ञान युगात वैद्यकीय वर्गाने रुग्णासोबत संवाद साधताना सोशल इंजिनिअरिंगची आवश्यकता असून आपल्या व्यवसायाचे ब्रँडिंग करताना अनेक पथ्य या दृष्टीने सांभाळण्याची गरज असल्याचे मत ज्येष्ठ होमिओपॅथी तज्ञ डॉ.संदिप चव्हाण यांनी व्यक्त केले.
होमिओपॅथिक एज्युकेशन सोसायटी द्वारा संचालित अकोट स्टॅन्ड रोडवरील होमिओपॅथिक महाविद्यालयात आयुष मंत्रालयाच्या निर्देशाने होमिओपॅथीचे जनक सर सेमीअल हॅनेमन यांच्या जयंती पर्वावर दहा दिवसीय वैद्यकीय प्रबोधन कार्यक्रम बुधवारपासून प्रारंभ झाला. हा कार्यक्रम दिनांक 10 एप्रिल पर्यंत सुरू राहणार आहे.
होमिओपॅथी एज्युकेशन सोसायटीचे अध्यक्ष डॉ एस एस बुटे यांच्या अध्यक्षतेत आयोजित या प्रारंभ सोहळ्याला उद्घाटक म्हणून राष्ट्रीय होमिओपॅथीक संस्थान सदस्य, माजी केंद्रीय होमिओपॅथीक सदस्य डॉ.किशोर मालोकार, प्रमुख वक्ते म्हणून ज्येष्ठ होमिओपॅथी तज्ञ डॉ.संदिप चव्हाण, होमिओपथीक एज्युकेशन सोसायटीचे सचिव डॉ.जयप्रकाश जयस्वाल, कोषाध्यक्ष व्ही एस जानी,प्राचार्य डॉ.संजयकुमार तिवारी, संस्थेचे माजी अध्यक्ष डॉ.तिलकराज सरनायक आदी उपस्थित होते.
सर हॅनेमन यांचे प्रतिमापूजन व मान्यवरांच्या स्वागताने या कार्यक्रमाचा प्रारंभ करण्यात आला. तर डॉ.संदिप चव्हाण यांना प्राचार्य डॉ.तिवारी यांच्या हस्ते सन्मानित करण्यात आले, तसेच डॉ.मालोकार यांना संस्थेचे अध्यक्ष डॉ.बुटे यांच्या हस्ते सत्कार करण्यात आला.
प्रमुख वक्ते डॉ.संदिप चव्हाण यांनी यावेळी उपस्थित होमिओपॅथी विद्यार्थ्यांना मार्गदर्शन करीत वैद्यकीय व्यवसाय करीत असताना कोणत्या बाबींचे पालन करावे, याचे सांगोपांग विवेचन केले. वैद्यकीय जगतात सफल होमिओपॅथी तज्ञ होण्यासाठी अनेक बाबींची काळजी करावी लागते. सर्वप्रथम या क्षेत्रात सोशल इंजिनिअरिंग करून रुग्णांशी भावनिक नाते तयार करावे लागते.
वैद्यकीय विश्व हे अत्यंत पवित्र क्षेत्र असून यामध्ये रुग्ण हा वैद्यकीय वर्गाला देवाची उपमा देतो. याची जाणीव ठेवून रुग्णांशी भावनिक नाते, नैतिकता, पारदर्शकता निर्माण करणे फार गरजेचे आहे. त्याचबरोबर रुग्णांच्या मनात विश्वास निर्माण करत असतांना व्यवसायात साधेपणा,स्पष्टता व निरंतरता आवश्यक असून रुग्णांची मानसिकता ही सर्वप्रथम तपासणीसाठी आवश्यक असल्याचे मत डॉ.संदिप चव्हाण यांनी यावेळी व्यक्त केले.
ते म्हणाले, रुग्णात सर्वप्रथम आपल्या पॅथीच्या संदर्भात विश्वासाहर्ता निर्माण करा. आपल्या व्यवसाय वाढीसाठी योग्य त्या प्रचार तंत्र, समाज माध्यमे व ( ए.आय. ) आर्टिफिशियल इंटेलिजन्सच्या माध्यमातून उपयोग करून आपले क्षेत्र सुदृढ व विकसित करून नवनवीन संशोधने आत्मसात करून रुग्णांना आपल्या कसबी उपचाराने बरे करा. या पॅथीला विश्वासाचे हमखास प्रतीक करण्याचे आवाहन त्यांनी यावेळी केले.
यावेळी त्यांनी पॉवर पॉईंट द्वारे सुरेख विवेचन करीत मार्गदर्शन केले. कार्यक्रमाचे उद्घाटक राष्ट्रीय होमिओपॅथीक संस्थानचे सदस्य डॉ किशोर मालोकार यांनीही वैद्यकीय विद्यार्थ्यांना मार्गदर्शन करीत उद्याचे सफल होमिओपॅथी तज्ञ असणाऱ्या विद्यार्थ्यांना नवनवीन प्रयोग आधुनिक विज्ञानाशी सुसंगत होऊन या पॅथीला बळकट करण्याचे आवाहन त्यांनी यावेळी केले.
आपल्या अध्यक्षीय मनोगतात डॉ बुटे यांनी या उपक्रमाची माहिती दिली. दिनांक 10 एप्रिल पर्यंत होमिओपॅथिक महाविद्यालयात चालणाऱ्या या कार्यक्रमांमध्ये प्रामुख्याने दि. 2 एप्रिल ला मटेरिया मेडिका सेमिनार होणार असून यात डॉ.कल्पना धोटे आणि डॉ.उज्वला भटकर मार्गदर्शन करणार आहेत. दि 4 एप्रिल रोजी पेरीओडिक टेबल ऑफ होमिओपथी यावर डॉ.जे डी पाटील यांचे व्याख्यान ,दि 6 एप्रिल ला ऑरगॅनॉन ऑफ मेडिसिनच्या संदर्भात विस्तृत मार्गदर्शन डॉ. भिसे मॅडम करून होमिओपॅथी मटेरिया मेडिकाच्या संदर्भात विस्तृत मार्गदर्शन डॉ. धांडे व डॉ मोनिका तराळे करणार आहेत. होमिओपॅथिक शिबीर आणि जागरूकता मोहीम यावर डॉ. शाकिब आणि डॉ.सचिन धर्माधिकारी हे व्याख्यान देणार आहेत.
दि 7 एप्रिल रोजी डॉ.सॅम्युअल हॅनीमान यांच्या जीवनावर डॉ. कल्पना भिसे यांचे संबोधन, तर डॉ अरुण पंड्या यांचे केस प्रेझेन्टेशन विथ होमिओपथीक अप्रोच, डॉ.मिलिंद गद्रे हे होमिओपॅथिक फार्मसी संदर्भात विस्तृत मार्गदर्शन करणार आहेत.
दि 8 एप्रिल रोजी डॉ हेमलता लद्दड यांच्या नियंत्रणात सांस्कृतिक कार्यक्रम, अस्मिता देशमुख आणि डॉ. हर्षलता कोले यांच्या नियंत्रणात पोस्टर व क्वीज स्पर्धा,दि 9 एप्रिल रोजी सकाळी 10 वाजता नरेंद्र श्रीवास यांच्या नियंत्रणात योगा आणि क्रीडा स्पर्धा होणार आहे.10 एप्रिल रोजी दु 3 वाजता डॉ रवी कुचर यांच्या उपस्थितीत सर सॅम्युअल हॅनेमन यांची जयंती साजरी करण्यात येणार आहे.
यात सर्व विद्यार्थ्यांनी उपस्थित राहण्याचे आवाहन करण्यात आले. होमिओपॅथिक महाविद्यालयाच्या डॉ अस्मिता देशमुख, डॉ हर्षलता कोले यांच्या समन्वयात आयोजित या कार्यक्रमाचे संचालन डॉ स्वाती राठोड यांनी तर आभार डॉ रुची चौरसिया यांनी मानलेत.
यावेळी प्रा. डॉ. गद्रे,डॉ. कल्पना भिसे, डॉ चिंचोळकर,डॉ धांडे,डॉ. धर्माधिकारी, डॉ. देशपांडे,डॉ.श्रीवास,डॉ. प्रवीण महानकर,डॉ. डॉ. तराळे,डॉ.अपर्णा वाकोडे,डॉ. वैशाली डोसे, डॉ.सारडा,डॉ.माधुरी माने,डॉ. शाकिब, डॉ. मिश्रा समवेत विद्यार्थी व कॉलेजच्या अधिकारी व कर्मचारी वर्ग मोठ्या संख्येने उपस्थित होता.
००००००००००००००००००००००००
SUPER NEWS 24 विजय द. केंदरकर, ज्येष्ठ पत्रकार
SUPER NEWS 24
विजय द. केंदरकर, ज्येष्ठ पत्रकार
संवाद : 9371854706
महत्वपूर्ण सकारात्मक बातम्या व आंतरराष्ट्रीय बातम्या, स्पर्धा परीक्षा, IAS मिशन, शिक्षण, साहित्य, अध्यात्म, राशीभविष्य, कलावंत, चित्रपट, नाटक, संगित, माहितीपूर्ण लेख, धार्मिक, निसर्ग पर्यटन, तंत्रज्ञान, आरोग्य, वित्त, जीवनशैली, प्रवास, फॅशन, खाद्य, तंत्रज्ञान, विशिष्ट छंद, आयुर्वेद, भ्रमंती सतत नाविन्यपूर्ण माहिती मिळविण्यासाठी ...
Follow this link to join my WhatsApp group or contact 9371854706
टिप्पण्या
टिप्पणी पोस्ट करा