घरगुती सिलेंडर वितरणावर प्रशासनाचे कडक नियंत्रण आवश्यक
सनातन संस्कृती महासंघाची मागणी
•अकोला :- मध्य पुर्वेत सुरू असलेल्या युद्धामुळे संपूर्ण जगातील तेल आणि गॅस चा पुरवठा प्रभावित झाला आहे. गॅस वितरकांच्या कार्यालया समोर सकाळ पासून ग्राहक रांगेत उभे असल्याचे वास्तव आहे. ग्राहकांनी नियमानुसार ऑनलाइन बुकिंग केल्यावर त्यांना कालक्रमानुसार घरपोच सेवा मिळणे आवश्यक आहे.
एका ट्रकमध्ये साधारणपणे ३०० वर सिलेंडर असतात. काही वितरकांनी ग्राहकांना घरपोच सेवा देणे बंद केले आहे. ऑनलाइन बुकिंग केल्यावर ग्राहकांना वितरकांच्या कार्यालयात जाऊन रक्कमेचा भरणा करून पावती घ्यावी लागते.
ट्रक जेंव्हा येईल त्यावेळेला पुन्हा रांगेत लागून सिलेंडर न्यावे लागते. ट्रक कधी येईल याची माहिती नसल्याने तसेच पावत्या जास्त फाडल्यामुळे ग्राहकांना सिलेंडर मिळेलच याची खात्रीदेखिल मिळत नाही. वितरक ग्राहकांकडून आगाऊ रक्कम घेऊन तीचा वापर करतात. हे योग्य नाही. काही वितरकांचे कार्यालय आणि गोदाम एका टोकाला असतात. ते ग्राहकांना सिलेंडर नेण्यासाठी शहराच्या दुसय्रा टोकाला बोलावतात. याचा ग्राहकांना आर्थिक, मानसिक आणि शारीरिक त्रास होतो आहे.
प्रशासनाने जाहीर केलेल्या एल पी जी हेल्पलाईन क्रमांकावर शासकीय सुट्टी च्या दिवशी फोन केला असता, मोबाईल बंद होता. प्रशासनाने हेल्पलाईन क्रमांक दररोज किती वाजता पासून किती वाजेपर्यंत सुरू राहील, तसेच सुट्टी च्या दिवशी सुरू राहील का? याचा जाहीर खुलासा करावा.
युद्धामुळे गॅस च्या पुरवठ्यावर परिणाम झाला आहे ही, वस्तूस्थिती असली तरी रांगा बघून लोकांमध्ये विनाकारण घबराट निर्माण होवू नये म्हणून, प्रशासनाने गॅस वितरकांनी ट्रक आल्यानंतर ऑनलाइन बुकिंग केलेल्या ग्राहकांना कालक्रमानुसारच घरपोच सेवा द्यावी, असे सक्त निर्देश देण्याची व्यवस्था करावी. अशी मागणी सनातन संस्कृती महासंघातर्फे ऋषिकेश जकाते यांनी केली असल्याचे प्रसिद्धी प्रमुख विजय केंदरकर आणि मिलिंद गायकवाड यांनी कळविले आहे.
टिप्पण्या
टिप्पणी पोस्ट करा